Waziri Mhagama afanya ziara Wilayani Karagwe.

Imewekwa: July 11th, 2017

Kituo cha Afya Kayanga chaongezewa milioni 100  kujenga wodi ya pili.

Na  Geofrey A.Kazaula – Kayanga, Karagwe

Ujenzi wa  Kituo cha Afya Kayanga umeongezewa nguvu baada ya  Mh, Jenista  Mhagama ambaye ni  Waziri  wa Nchi Ofisi ya Waziri Mkuu, Sera ,Bunge  Ajira na watu  wenye ulemavu kutoa tamko la Serikali la kuongeza Shillingi Million Mia moja ( T.Sh 100,000,000.00)  ili kuongeza jengo la wodi baada ya kukamilika kwa ujenzi wa wodi ya akina mama unao endelea.

Akizungumza katika mkutano uliofanyika kwenye viwanja vya  Kituo cha Afya Kayanga , waziri Mhagama amesema kuwa lengo la serikali ni kuhakikisha kuwa huduma zinatolewa kwa wananchi na hasa wa hali ya chini kwa kuboresha miundombinu ikiwemo Sekta ya Afya.

Ameeleza kuwa miongoni mwa sababu za kufanya ziara katika Wilaya ya Karawe  ni pamoja na kufuatilia maagizo mbalimbali ya viongozi na  juu ya  urejeshaji wa hali ya miundombinu  baada ya kutokea kwa tetemeko la ardhi   mnamo 10/09/2016.

Ameeleza kuwa kiu ya Serikali  ya awamu ya tano inayo ongozwa na Rais Dk.  John  PombeJoseph  Magufuli ni kuona huduma zinatolewa kwa wananchi na kueleza kuwa ujenzi wa wodi ya akina mama pamoja na chumba cha kuhifadhia maiti ulio gharimu million 170.7 ukamilike mapema  mwezi Oktoba/Novemba huu na kuanza kutoa huduma kwa wananchi .

Akiwa Kituoni hapo, Mh Waziri Mhagama alikagua shughuli za ujenzi zinazoendelea  pia aliwatembelea akina mama waliojifungua pamoja na wagonjwa mbalimbali waliolazwa katika kituo cha afya Kayanga ambapo licha ya kuwapa pole alieleza kufurahishwa na kushuka kwa idadi ya vifo vya akina mama wakati wa kujifungua ikiwa ni baada ya kituo hicho kuanza kutoa  huduma za upasuaji .

Kuhusu kinga dhidi ya njaa, Waziri Mhagama amewataka wananchi kulima mazao yanayo kabiliana na ukame badala ya kutegemea zao moja la ndizi kwaajili ya chakula na kusisitiza kuwa kila familia ilime mazao ya kinga ya njaa ili kujihakikishia juu ya upatikanaji wa chakula.

Amesisitiza juu ya matumizi mazuri ya fedha na kusema kuwa T.Sh 170,7 Milloni zilizoletwa na Serikali pamoja na T.Sh 100 Million itakayo letwa, fedha hizo zote zielekezwe katika kujenga wodi na kulitaka baraza la madiwani kusimamia fedha hizo ili zifanye kazi yenye tija itakayo wanufaisha wananchi.

Kazi ya ujenzi wa wodi ya akina mama na chumba cha kuhifadhia maiti katika kituo cha Afya Kayanga yenye thamani ya T.Sh 170.7 Milion  ilianza mnamo tarehe 26/06/2017 na inatarajiwa kukamilika mnamo tarehe 6/10/2017  na Serikali imeridhia kuongeza kiasi cha T.Sh 100 Million kwa ajili wa ujenzi wa wodi nyingine.