Wajumbe wa Kikao cha Kamati ya Ujenzi, Uchumi na Mazingira wakiwa kikao cha robo ya nne kwa mwaka 2017/2018

Imewekwa: May 2nd, 2018

‘WANANCHI   LIMENI AINA YEYOTE YA MAHARAGE KADRI MNAWEZA KUPATA SOKO’ – KAMATI YA UJENZI, UCHUMI NA MAZINGIRA

Na Innocent E. Karagwe, KARAGWE.

Kamati ya Uchumi, Ujenzi na Mazingira, chini ya Mwenyekiti wake Mh. Valence Kasumuni kwa kauli moja, kupitia kikao chake kilichoketi hivi karibuni katika ukumbi wa Halmashauri, Wilayani hapa, wameazima wananchi wa Karagwe waendelee kulima aina yeyote ya  maharage kadri wanavyoona wanaweza kupata uhakika wa masoko kwa ajili ya kuyauza.

Uamuzi huu ulifikiwa ili kuzima uvumi unaoeneo katika baadhi ya maeneo  wilayani hapa ukidai  kwamba serikali imewazuia  wakulima wa zao la maharage kulima aina fulani ya maharage hayo huku na ukilazimisha kulimwa kwa aina fulani ya maharage jambo ambalo si kweli kwa mujibu wa taarifa za kikao hicho.

Katika hatua nyingine kikao hicho kilipokea na kujadili taarifa nyingine zilizozihusu Idara na Vitengo kadhaa ambavyo kwa mujibu wa sheria huwasilisha taarifa zao kwenye kamati hiyo.

Idara hizo zilikuwa ni pamoja na Idara ya Ujenzi, Usafi na Mazingira, Idara ya Ardhi na Maliasili na Kitengo cha Ufugaji Nyuki.

Aidha taarifa za Idara za Kilimo, Umwagiliaji na Ushirika, Mifugo na Uvuvi na Kitengo cha TEHAMA ziliweza kuwasilishwa kupitia kikao hicho.

“Tunaendelea kusisitiza kwamba Idara ya Ardhi na Maliasili ishirikishe makampuni binafsi katika upimaji wa  ardhi wilaya Karagwe ili kuweza kuongea kasi ya upimaji ” walisisitiza wajumbe katika mjadala wao kwenye  mojawapo ya ajenda zilizowasilishwa kikaoni hapo.

Aidha msisitizo mwingine kwenye kikao hicho ulikuwa ni juu ya  wananchi  kusisitizwa juu ya azma ya serikali katika mikakati ya kuboresha zao la kahawa na hii ni  kutokana na serikali kuweka mkazo katika zao hilo la biashara ambapo wananchi wanapaswa kujengewa uelewa wa kuzingatia uuzaji wa zao hilo kwenye vyama vya msingi ambapo hadi sasa maafisa ushirika wanaendelea kutoa Elimu ya ushirika kwa wananchi wa maeneo hayo.

Vikao vingine vya kamati vinatarajiwa kuendelea ili kufanikisha kufanyika kwa kikao cha Baraza la Madiwani Wilayani hapa kinachotarajiwa kufanyika mnamo Mei 18- 19, mwaka huu.