ICAP Kuzuia Maambukizi Mapya ya UKIMWI

Imewekwa: November 13th, 2017

ICAP  Kuzuia maambukizi mapya ya UKIMWI.

Na, Geofrey  A.Kazaula, KARAGWE 

Shirika  la kimataifa linalopambana na UKIMWI  ambalo ni International Center  of AIDS  Care and Treatment Programs (ICAP )  kwa sasa limepata mradi mpya utakao dumu kwa muda wa miaka mitano yaani kuanzia  mwaka 2016/2017 hadi 2021/2022.

Kwa mujibu wa Manager mradi  wa Mkoa wa Kagera Dr, Omar Msumi  Shirika hilo limekuwa likifanya kazi ndani ya Mkoa wa Kagera na sasa Shirika limepata mradi mpya uitwao ‘FIKA’ ambao utajikita katika kuzuia maambukizi  mapya ya VVU kwa wasichana walioko katika umri wa barehe na wale wanaofanya biashara ya ngono.

Kwa mujibu wa  Utafiti wa viashiria vya UKIMWI na Malaria nchini wa mwaka 2011/2012 wastani wa kiwango cha maambukizi  ya VVU miongoni mwa watu wenye umri kati ya miaka 15-49  ni asilimia 5.1, hii ina maana kuwa  katika kila watu 100 watu watano (5) wanaishi na maambukizi ya  VVU.

Aidha, takwimu zinaonesha kuwa  kuna takribani watu 1,325,271 wanao ishi na VVU nchini kwa mujibu wa takwimu  kwa kipindi kinachoishia Juni 2016.

Dr Msumi amefafanua kuwa kwa Wilaya ya Karagwe , mradi ulianza tangu April, 2017  kwa baadhi ya Kata na kwamba sasa mradi umepanuka na kuifikia  Wilaya nzima.

Aidha, ameeleza kuwa mradi huo unatekelezwa na Shirika kwa kushirikiana na Serikali kupitia mganga mkuu wa Mkoa na Mganga mkuu wa Wilaya.

Kwa upande wake mganga  mkuu wa Wilaya ya Karagwe Dr Libamba Sobo ameeleza kuwa  mradi unaendelea kutekelezwa wilaya nzima na kwamba lengo la serikali ni kumaliza kabisa maambukizi mapya ya VVU.

”Lengo la Serikali ni kuhakikisha maambukizi ya VVU yanaisha na kubakia  0 ifikapo mwaka 2030.’’, alisema Dkt. Sobo.

 Tayari shirika kwa kushirikiana na ofisi ya Mganga Mkuu  wa Wilaya ya Karagwe limetoa mafunzo kwa wataalam katika ngazi mbalimbali ambao watatekeleza mradi huo na kuhakikisha maambukizi mapya ya VVU yanafikia ukomo kama yalivyo malengo ya Serikali .