Chuo Kikuu cha Karagwe Kuzinduliwa Oktoba 29, 2017

Imewekwa: October 12th, 2017

Chuo Kikuu  cha Karagwe kuzinduliwa Oktoba 29, 2017

Na Geofrey A. Kazaula - Karagwe 

Chuo kikuu cha Karagwe ( KARUCO) kinacho  milikiwa na Kanisa la  kiinjili la Kilutheri Dayosisi ya Karagwe kina tarajiwa  kuzinduliwa  rasmi  mnamo tarehe 29/10/2017 ambapo wageni mbalimbali kutoka ndani na nje ya nchi watashiriki  uzinduzi  huo wakiwemo  viongozi wa ngazi za juu wa Kitaifa.

Waheshimiwa madiwani  wa Halmashauri ya Wilaya ya Karagwe  pamoja na viongozi wa chama cha Mapinduzi  wamefanya ziara katika chuo hicho  baada ya kupokea mwaliko wa Askofu Benson Bagonza ili kufanya ukaguzi wa miundombinu na kujenga uelewa wa pamoja kabla ya uzinduzi rasmi wa chuo kufanyika.

Ziara  hiyo pia imehusisha wataalam mbalimbali wa Halmashauri  ya wilaya ya Karagwe ambapo wameweza kutembelea sehemu mbalimbali za chuo hicho na kujionea mundombinu  iliyo kamilika na inayoendelea kujengwa.

Hadi sasa tayari miundombinu  ya maji imekamilika kwa sehemu kubwa, Bweni la kulala wanafunzi wa kike limekamilika, jengo la utawala limekamilika, maabara  zote zinazohitajika zimekamilika pamoja na Maktaba .

Miundo mbinu nyingine pia imekamilika  ikiwemo madarasa  na samani mbalimbali zitakazotumiwa na wanafunzi zimewekwa.

Kwa mujibu wa Askofu Bagonza, Miundombinu mingi imechangiwa na wanachi wa Karagwe  pamoja na waumini na pia wahisani  nao wamechangia  na wanaendelea kuchangia ili kuhakikisha Karagwe inakuwa na chuo  kikuu cha mfano.

Akifafanua juu ya Kozi zitakazo anza kutolewa na chuo hicho  Askofu Bagonza amesema kuwa wataanza na kozi nne ambazo ni Kilimo, Mifugo, Misitu na Mazingira na kwamba kozi nyingine zitafuatia badae.

Aidha, amezitaja baadhi ya fursa ambazo wananchi wa Karagwe  watanufaika nazo ikiwemo kupanua soko la mazao yao na mifugo  na kuikuza Wilaya kiuchumi  baada ya kuwa na wataalam karibu ambao pia watasaidia katikakuongeza thamani katika mazao ya wakulima na kutafuta soko. la pamoja.

Kwaupande wao waheshimiwa  madiwani wamepongeza jitihada zilizofanywa na Kanisa na kuahidi kutoa ushirikiano wa kutoshaili kuhakikisha malengo yaliyowekwa yanafikiwa.

Kuhusu migogoro ya ardhi iliyojitokeza siku za nyuma, waheshimiwa madiwani wamefafanua kuwa migogoro hiyo ilikuwa inachochewa na watu wa chache wasiopenda maendeleo  na kwamba tayari migogoro imekwisha na sasa ni kufanya maendeleo kwaajili ya watu wa Karagwe na taifa kwa ujumla.

Katika hatua nyingine, Askofu Bagonza ame eleza kufurahishwa na  ushirikiano anaopata kutoka kwa viongozi wa wilaya tangu miaka ya  1980 hadi sasa ambapo wanaenda kushuhudia hatua kubwa sana  ya maendeleo Karagwe.

Wah, madiwani wamemtaka  Askofu huyo kuwapuuza watu watakao taka kurudisha nyuma jitihada zinazoendelea kufanyika kwaajili ya maendeleo na kwamba Serikali haitakuwa tayari kuvumilia watu wanaotaka kukwamisha maendeleo  ya wananchi.

Kuhusu umiliki wa chuo, imefafanuliwa kuwa chuo hicho  ni mali ya wananchi wa Karagwe bila kujali tofauti zao za kiimani na kwamba kinaendelea kuchangiwa na watu mbalimbali kwani kinalenga kwenye mapinduzi ya kiuchumi na kijamii Wilayani Karagwe.

 ‘’Licha ya chuo hiki kusajiliwa kwa jina la Kanisa lakini ni mali ya wananchi wote wa Karagwe na kinaendelea  kuchangiwana waumini wa dini zote  hivyo natoa wito kwa kila mmoja wetu kuunga mkono jitihada hizi ili kuinua maendeleo ya wilaya yetu na taifa kwa ujumla.’’ alisema Askofu Bagonza

Ili kuwezesha wakulima kupata soko nzuri la mazao yao, Askofu Dkt  Bagonza amebainisha kuwa  mara baada ya chuo kuzinduliwa, upo mpango wa kujenga  vituo vya fursa vitano( Opportunity Centers )  ambapo vituo hivyo vitakuwa na miundombinu ya kila aina ikiwemo ya kuhifadhi mazao yasiharibike  na kwamba wakulima watakuwa wanauzia mazo yao katika vituo hivyo kwa umoja ili wawe na sauti ya pamoja ya kupanga bei ya mazao tofauti na ilivyo hivi sasa