MATANGAZO YA TBC KUBORESHWA WILAYANI KARAGWE.

Imewekwa: August 14th, 2021

Na Innocent E. Mwalo.

Mkurugenzi wa Mtendaji wa TBC, Dkt. Ayub Rioba hivi karibuni amefanya ukaguzi wa eneo la mradi wa mitambo ya Shirika la Utangazaji la Taifa (TBC) katika kijiji cha Ahakishaka, katika kata ya Nyabiyonza, na kusisitiza dhamira ya serikali katika kuboresha mawasiliano ya redio na matangazo ya televisheni katika wilaya hii.

Kupitia mkutano huo alioufanya na viongozi wa wilaya na kijiji cha Ahakishaka, Dkt. Rioba amewahakikishia wananchi wa Karagwe kupitia kwa viongozi hao kuwa kukamilika kwa mradi huo kutaboresha mawasiliano ya redio katika wilaya ya Karagwe ambapo baadhi ya maeneo hususani kata za pembezoni zina changamoto kubwa ya usikivu wa matangazo ya redio hiyo ya taifa hali inayopelekea kusikiliza kwa matangazo ya nchi jirani za Rwanda na Uganda.

‘’TBC tuna dhima ya kuwafikia wananchi wote na katika maeneo yote hivyo basi kukamilika kwa mradi huu ni moja ya mafanikio ya njia ya kufikia malengo hayo’’, alisisitiza Dkt. Rioba.

Naye Diwani wa Kata ya Nyabiyonza Mh. Thomas Rwatabanza licha ya kumshukuru Mkurugenzi wa TBC na bodi ya shirika hilo alitumia wasaa huo kumomba Dkt. Rioba kusaidia kufikisha serikalini changamoto ya umeme iliyiopo katika eneo hilo akisisitiza ya kwamba pamoja na nia njema ya serikali kutaka kuboresha mawasiliano ya redio na televisheni lakini kama jitihada hazitafanyika za umeme kufikishwa kwenye maeneo hayo basi kwa kiasi fulani changamoto ya mawsiliano utaendelea kulikumba eneo hilo.